Nowa Pratyja jo zasej dypkownje srjejź nazymskego mjaseca w LND wujšła a dojźo w pśiducych dnjach k swójim kupcam. Jeje titelna wjas jo Strjažow. Ceła kopica pśinoskow wó njej, dalšne zajmnostki ze serbskich stawiznow, rědne wulicowańka, basni a gódańka a styri pśinoski w nimskej rěcy – lazowanje Pratyje se lonujo za kuždego!

Strjažow – tam jo kantor Mato Rizo w lěśe 1891 wugótował prědny serbski wejsny swěźeń a z tym prědny spiwaŕski swěźeń w Dolnej Łužycy. Toś ta wjas pśedstajijo se w Serbskej pratyji 2026 z cełeju kopicu pśinoskow, źož samo strjažojske luźe wjele njeznatego wó swójej jsy zgóniju. Pratyja spomina se wě teke na młoge jubileje ako na 50 lět Nimsko-serbskego ansambla w Žylowje abo 75 lět dolnoserbskego programa w radiju. Dogromady 26 awtorkow a awtorow su pisali za našu Pratyju, kótaruž wobogaśiju młoge dalšne teksty z našogo pismojstwa – mjazy nimi wót strjažojskego šularja Mata Riza.