Zabawna dwurěčna čitanka so w Zarěču předstaji
Hač wo wěčnej serbskej ponižnosći abo wo zasakłym boju Rakečanow wo serbskeho fararja, hač wo pozběhowanju Njeswačidlskeho póstowstwa abo wo wotewrjenju Minakałskeje kofejownje znateho a dobreho pjekarja a dobreho Serba knjeza Robšinka, Serbske Nowiny běchu wo wšěm derje informowani, štož so w serbskich wsach dokoławokoło Kaponicy stawaše. Kaž z čitankomaj „Pod Čornobohom – Unterm Czorneboh“ (2012) a „Mjez Křičom a Lubatu – Zwischen Lutherberg und Löbauer Wasser“ (2015) měri so Grojlich z nowostku na serbske a na němske čitarstwo Hornjeje Łužicy, kotrejž matej zdźěla samsne korjenje. Snadź tón abo tamny zajimc w knize njenadźicy na pozabyteho prjedownika storči.