Njeparujomne wudospołnjenje k Němsko-hornjoserbskemu słownikej
Wopřija nowy serbski słowoskład minjenych 30 lět
Přehladany a wobdźěłany nowonakład

Słownik noweje leksiki je so jako njeparujomna přiručka za wukmanjenje w modernej serbskej spisownej rěči wopokazał. Wón wudospołnja dwuzwjazkowy Němsko-hornjoserbski słownik (1989/91) a wopřija nowy słowoskład, kotryž je w zašłych tři lětdźesatkach našu spisownu maćeršćinu wobohaćił.
Awtorce Anja Pohončowa a Jana Šołćina stej 2. nakład dospołnje přehladałoj a na dobro wužiwajomnosće wobdźěłałoj. Při tym stej dodałoj dalše rěčne nowotwórby z najblišeje zašłosće, ale tež druhe słowa zas wušmórnyłoj, kotrež njejsu so w praksy přesadźili. Słownik noweje leksiki wotbłyšćuje tuž aktualny staw wuwića našeje spisowneje maćeršćiny a pomha serbsce wuknjacym a pisacym při tym, stajnje to prawe słowo namakać.