W 20tych lětach jo se česki bur a polygot Václav Srb (1901-1976) z českich Chýnic pla Pragi wopoznał ze Serbami. Pśeznanjony wo tom, až pokažo jogo mě na serbski pochad, jo skoro dolnoserbsku rěc nawuknuł, do Towaristwa pśijaśelow Serbow w Praze zastupił a z kolasom Dolnu Łužycu wuzgonjował. Tak jo se z Minu Witkojc zmakał, kenž jo jogo pozbuźiła w našej rěcy teke basniś. Jo jich wěcej ako 20 napisał, kenž se zgromadnje z jogo dolnoserbskimi pśełožkami basnjow Petra Bezruča, Karela Hyneka Máchi a Jaroslava Vrchlickego prědny raz w knigłach wozjawiju. Woni wujdu pśi goźbje jogo 100. narodnego dnja w decembrje 2001.