Ze stwórtym zwězkom cełkownego wudawka Kosykowych spisow wótzamknjo se edicija jogo twórbow z Wjerbańskego casa. Zwězk wopśimjejo gronka, pśisłowa a gódańka, casnikarske pśinoski basnikarja za Casnik a Pratyju, wulicowańka a korespondencu až k jogo wudrogowanju, wšykno z wótpowědnymi wobšyrnymi pśispomnjeśami. Wósebna pśechwatanka jo wótśišć dopomnjeńkow Kosykowego śeśka, kótarež jo rozgłosownica Roža Šenkarjowa w lěśe 1956 zapópadnuła. Ediciski wjerašk togo zwězka jo pśeglěd casowych a žywjeńskich tšojenjow, zachopinajucy z wudaśim Willowych spiwarskich 1786 až do wónego 1. nowembra 1883, ako jo Mato Kosyk do Ameriki wudrogował.