Za hłownu temu protyki lěta 2024 je so redakcija Serbskeje protyki za cyle wosebitu a z domiznu zwjazanu temu rozsudźiła – Jutry.
Je to jedyn z najwobšěrnišich, wosebje štož přihoty nastupa, a zdobom jedyn z najrjeńšich našich nałožkow.
Najwšelakoriše nastawki měli čitarjej tež wosebje to wotkryć, štož jednomu samomu při wopyće křižerjow na jutrownej njedźeli jako prěnje do mysli njepřińdźe: wobšěrne přihoty w konjencach a na statokach, organizacija koni, dźěła hospozow a wjele dalšich wažnych ćežišćow.
Znajeće hižo historiske pozadki konjaceho gratu abo wěsće, kak je so křižerski grat do mórskeho muzeja dóstał?
Runje tak nadeńdźeće w předležacej protyce wězo tež dalše literarne přinoški, hódančka a směški.