»Kak wobchadźamy z wobrazami a za čo je wužiwamy?«, praša so wudawaćel Jürgen Maćij w zawodnych myslach knihi. Składnostnje w lěće 2014 zarjadowaneje dźěłarnički a temje »Naša Łužica« sćěhujo, je so dźesać wćipnych, młodych fotografow na puć podało, so wědomje ze swojim wobswětom rozestajało a sej fotowe sujety wotkryło. Tak pokazuja swój wid na dźensnišu Łužicu. Nastała je pisana zestawa fotowych stawizničkow, kotraž powěda wo ródnej wsy a cyrkwi, wo swójbnym žiwjenju, architekturje srjedźneje Łužicy, wudobywanju wuhla, mytiskich bytosćach abo nakromnym Budyšinje. Interviewy z fotografami knihu skulojća a čitarjej wosoby za kameru zbliža. Wobhladowar fotow njech so z wobrazami rozestaja a so tak sam z dźělom stawiznički stanje.