Serbska protyka za lěto 2025 wabi čitarstwo do čitanja wěnujo so w praktiskej rubrice warjenju a receptam znateho serbskeho kucharja Tomaša Lukaša, we hłownym dźělu pak jubilejomaj w Kamjencu a Chrósćicach. 800. lět je dołha noha a tuž rjana přiležnosć raz za murjemi starodawneho města pokuknyć abo so kołowokoło Chrósćic rozhladować. Nic jenož Boršć a koncerty na Pastwinej horje wabja ludźi – Kamjenc skića swojim wopytowarjom wo wjele wjac. A tež w Chrósćicach je so w zašłych lětstotkach a lětdźesatkach wjele stało. Dalše zajimawostki wjedu nas do Lahnskeho doła, hdźež je hižo Jakub Bart-Ćišinski pobył, do „Běłeho kołpja“ w Šěrej dźěrje, do Małowjelkowskeje sotrownje abo do Krapowa. Podajće so znowa z redaktorom Pětrom Šołtu do pisaneho swěta Protyki!