Jeho fotografije swědča wo žiwej wěrje, kotraž pokazuje so w hajenju nałožkow a wašnjow w běhu lěta runje tak kaž wšědny dźeń, hdyž chodźa wěriwi z wosadnikom w ruce kemši abo hladaja rowy swojich zemrětych přiwuznych. Wobrazy wobrubjeja teksty Gerata Wornarja, kotryž zhladujo na swoju domiznu a swój lud zwěsći: „Mam tónle serbski kraj a jeho ludźi rady. Tu sym doma. To je mi na zemi kus njebjes.“