Ludowe nakładnistwo Domowina

Runje w prawym času, do spočatka zymy, je woblubowana stawizna „Knjez Mróz a knjeni Zyma“ znowa w poskitku. 1990 na tačeli a kaseće wušła powědka Marje Krawcec, ze 14 spěwami Marhaty Cyžec, je hižo njeličomne dźěći zawjeseliła. Nětko je znowa přistupna, wšako wuńdźe na CD, kotrejž je zešiwk ze spěwnymi tekstami připołoženy.

dalše informacije»

Přeprošujemy na 2. koło literarnych dźěłarničkow. W lěće 2020 chcemy so intensiwnje z basnjemi zaběrać. Prěnja cyłodnjowska dźěłarnička budźe sobotu, 29. februara w Budyšinje. Chcemy w małym kole teksty wobsahowje, formalnje a rěčnje předźěłać kaž tež wšelake impulsy do dalšeho pisanja dać.

Přizjewće so hač do 10. januara 2020 a budźće pódla, hdyž so nowa serbska literatura pječe!

Literarne dźěłarnički wuhotuje Załožba za serbski lud z podpěru Ludoweho nakładnistwa Domowina a Zwjazka serbskich wuměłcow.

dalše informacije»

W lětach 1884 do 1886 wuda Arnošt Muka jedyn z wusahowacych tekstow serbskeje publicistiki – „Statistiku łužiskich Serbow“. Jeje wuznam ležeše w prěnim rjedźe w materialu k ličbje hornjo- a delnjoserbskeje ludnosće na kóncu 19. lětstotka. Tola kniha je wjele wjace hač prosta statistika. Ze swojimi wobšěrnymi wopisowanjemi wsow, ze swojimi rěčnopolitiskimi hódnoćenjemi a namołwami je wona fascinowace žórło za ludowědnika, stawiznarja a sociologu runje tak kaž za wjesneho chronista abo na lokalnych stawiznach zajimowaneho.

dalše informacije»

„Wšědne hesła“ w serbskej rěči, kiž su na lěto 2020 wušli, změja mały jubilej. Dwacety raz podadźa so wone na puć do wosadow. Wšón čas je so Hinc Šołta swěru wo zestajenje a přełožk starał, zo by tónle přewodnik swój puć do serbskich křesćanskich swójbow namakał.

dalše informacije»

W Ludowym nakładnistwje Domowina je nowa kniha z titulom „W času zeza časa“ wot Róže Domašcyneje wušła. W swojich basnjach a krótkich tekstach wěnuje so basnica znowa jej bliskim temam kaž serbskej rěči, zničenemu łužiskemu krajej, nahrabnosći, zachodnosći zemje a žiwjenja a bóle hač dotal njezwučenym wobkedźbowanjam a fantastiskim wumyslenkam w přirodźe.

dalše informacije»

Dypkownje ze započatkom nazymy dóńdźe najnowši lětnik Serbskeje protyki čitarjam do domu. Klětu je titulna wjeska wosrjedź Łužicy ležace Njeswačidło. Wjes je mnoho slědow w stawiznach zawostajiło. Tuž bě na času so wjesce bliže wěnować. Handrij Wirth rozestaja so ze stawiznami Njeswačidła, Arnd Lehmann předstaja tamniši Domizniski muzej, Lubina Malinkowa wobswětla žiwjenje tule spomóžnje skutkowaceho Jurja Mjenja a Franc Šěn wopisuje basniske spočatki rodźeneho Njeswačana Jana Hajncy.

dalše informacije»

Swoju tradicionelnu nazymsku čitansku turneju zahaji Ludowe nakładnistwo Domowina lětsa sobotu, 21. septembra z 25. literarnej kermušu w Njeswačidle. Wot póndźele pokročuja čitanja w Hornjej a Delnjej Łužicy, mjez druhim w Pančicach-Kukowje, Ralbicach, Brjazynje, Wětošowje a Žylowje. Pjeć knižnych premjerow je planowanych, tak předstaji Róža Domašcyna swoju nowu zběrku „W času zeza časa“ a Michał Anders a Pětr Lipič nowostku „Z Lipicy do hole“. Na dohromady dźesać zarjadowanjach čitaja awtorki a awtorojo z nowych knihow.

dalše informacije»

Maja Nagelowa słuša k wusahowacym serbskim wuměłčam přitomnosće. Składnostnje jeje 60. narodnin wuda Ludowe nakładnistwo Domowina přehlad jeje tworjenja w knize z titulom „kaskady • kaskaden“. Na zakładźe wjacorych stow grafikow, akwarelow a mólbow sćěhuje publikacija jeje wuwiću a wobswětla jeje tworjenje zašłych lětdźesatkow.

dalše informacije»

Składnostnje 400lětneho jubileja připokazanja Michałskeje cyrkwje ewangelskim Serbam Budyšina a wokolnych wsow rysuje předležaca němskorěčna publikacija jeje wotměnjawe stawizny. Serbski superintendent Jan Malink je knihu wudał.

dalše informacije»

Namołwjamy wšitkich młodych pisacych so pjera jimać.

Pisajće wo dźensnišim času, wo zašłosći abo wo přichodźe; wo ludźoch, kiž su wam bliscy, wo swojich wobkedźbowanjach a nazhonjenjach, wo zbožownych wokomikach abo strachach, wo swojich sonach a swojich žedźbach!

dalše informacije»