Beschreibung
Čitanski wurězk z knihi »Mortwa w grobli«
Wón dótkny so z porstom jeje tyła nad ćeńkim slěbornym rjećazkom a wobkedźbowaše, kak jeje móšk stawaše. Hižo cyłej měsacaj běštaj nětko hromadźe a přeco hišće dosahaše móličke dótknjenje, zo by ju rozpłomjenił.
»Přestań«, praji wona ćahajo, »abo chceš, zo so powróćimoj?«
Wón wobjimaše ju wotzady a šeptaše jej do wucha: »By da to tak zlě było?«
Wona dyrbješe so smjeć. Dopołdnja w hotelu by jeju nimale stwina lepiła, hdyž běštaj po snědani hišće raz do šěrokeho łoža ze swětłozelenym poćehnjenjom padnyłoj, před kotrymž bě so spočatnje tróšku bojała, dokelž wupadaše tak oficialne, cyle hinak hač wuske lěhadka w studentskim domje, hdźež běštaj so dotal lubowałoj. Wón bě hakle jeje třeći přećel, ale na rozdźěl k tamnymaj bě jemu woprawdźe chutne z njej. Bě cyle cyplkojty za njej, hewak njeby jej ženje dwudnjowski wulět do Błótow namjetował a samo prawy hotel skazał. Tež nětko běštej jeho ruce zaso pod jeje t-shirtom.
»Pój, daj namaj něhdźe přistawić!«, rjekny wón mjelčo a nimale tróšku prošo. Wona wobroći so k njemu a jeho wokoši. Čołm so mócnje začumpa.
»Hej«, praji wona, »hač k přibrjohej pak dyrbimoj hišće přińć. Što měniš k łuce tamle naprawo za mostom?«
Dale zady běchu drje swisle čerwjenocyheloweho domu widźeć, ale trawa bě wysoka dosć a husta kerčina wjerby škitaše blečk před wćipnymi pohladami z mosta. Při wulězenju by so wona nimale do groble sunyła. Wón sćahny ju k sebi na přibrjóh a pytny, kak so wona hnydom k njemu tuleše. Wón njewza sej ani chwile, čołm prawje přiwjazać, ale ćisny powjaz jenož zlochka přez kolik a da so z njej dozady padnyć. Kajku bě sej to holčku popadnył ...
Wona zadźerža jemu hubu a praji: »Mjelčo!« Ale potom bě wona ta, kiž bu wótře, a wón dźeržeše jej ruku před nós, do kotrejež so wona zakusny. Hdyž bě nimo, běštaj wobaj přepoćenaj. Wón ležeše hišće napoł na njej, wona duješe jemu do włosow a to chłódźeše woprawdźe jeho čoło.
»Sy w hotelu tež tu stawiznu čitał?«, wopraša so wona. »Stawiznu z wódnym mužom, kiž ćaha młode holcy, kotrež so jemu lubja, do groble a pokazuje jim swoje pokłady?«
Zusatzinformation
ISBN | 978-3-7420-2257-8 |
---|---|
Sprache des Artikels | Obersorbisch |
Bibliografische Angaben | 2013 198 s., kapsna kniha 170 |