Tak je nastała kniha z najwšelakorišimi temami a časami jednanja a rozdźělnymi stilemi pisanja. Tale literarna pisanosć je přewšo powabjaca, wšako je z wulkej wěstosću za kóždu čitarku a kóždeho čitarja něšto pódla, štož ju abo jeho zajimuje. Jěwa-Marja Čornakec na přikład wopisuje na žortne wašnje wuskutki lěkowanja ze »zelowym dynamitom«. Tež Jurij Koch je ze žortnym powědančkom wo wosebitym šerjenju zastupjeny. Někotři zhladuja do zašłosće, druzy wěnuja so dźensnišemu časej. Krótka zabawna lektura za dźeń a dlěše nazymske wječory.