Rady by bur Worjech přez žeńtwu Mikławša, najmłódšeho z třoch swojich synow a tohorunja naslědnik na kuble, z Moniku, dźowku nahladneho bura-wudowca Pětranca ze susodneje wsy, swoje wobsydstwo rozmnožił. Ale kaž w žiwjenju tak je, přeco so wšo po přećach jednotliwca njeradźi. Mikławš nima ani wóčko za Moniku, ale zalubuje so do Hilže, kotraž je pola Worjechec kaž swójska dźowka žiwa a tam mjeztym na rjanolinku wotrostła. Z tym pak so připowěduje harmoniskemu žiwjenju na kuble pod worješinu katastrofa. Dotal njewozjewjena nowela ze zawostajnstwa Antona Nawki (1913-1998) wuńdźe 2003 składnostnje jeho 90. posmjertnych narodnin.