W prěnjej stawiznje “W dalinach swětnišća” podaštaj so 10-lětna Lizka Teplec a 12-lětny Danko Rota ze swětnišćowej łódźu “Łužica 3000” na dołho přihotowanu ekspediciju do swětnišća. Młodymaj slědźerjomaj běše trajnje po boku Zinja – kosmiski kompjuter z dalokowuwitej inteligencu. W běhu nimale dwulětneho wuskušowanja přepytowachu 15 galaksijow, wotkrychu 33 nowych žiwjenskich formow a hišće tójšto dalšich nowych njezapomnitych dyrdomdejow wobsadka dožiwi. Tež w druhej stawiznje “Štom wšěch časow” čakachu na hłownej figurje Miloša a Lindu njeličomne dyrdomdeje. Jednoho dnja wuhladaštaj Linda a Miloš prastary tołsty dub w lěsu. Wobpřimnyštaj jón a naraz so wšitko wokoło njeju zawjertny, štom so wočini a dźěsći přiwza. Jako zaso k sebi přińdźeštaj, njemóžeštaj so dodźiwać, dokal a do kotreho časa je jeju štom donjesł.