Wšědne hesła Ochranowskeje bratrowskeje wosady na lěto 2025 zhromadne wudaće ze Serbskim ewangelskim towarstwom Wšědne hesła Ochranowskeje bratrowskeje wosady su hrona z biblije, kotrež přewodźuja serbske křesćanske swójby přez lěto, zo bychu je zwjeseleli a pohonjowali. Za lěto 2025 je Ekumeniske zjednoćenstwo za čitanje biblije jako lětne hesło wuzwoliło sadu „Pruwujće wšitko, to dobre wobchowajće.“ (1 Tes 5,21). „Hdyž japoštoł křesćanow swojeho časa namołwja wšitko pruwować, přeprosy na kritisku rozmołwu – tež wo swojim dźěle jako japoštoł. Ale, tak wón praji, na kóncu dźe wo to, to dobre wobchować a nic wšo bjez wuwzaća zatamać.“ Takle čitamy w přewodnych słowach k 295. wudaću. A dale: „Smy sej wěsći, zo dosć dobreho namakaće, štož je hódne wobchować. Potom so tež waše žiwjenje přez zetkanje z Bohom kóžde ranje ponowi.“ Zešiwk je zhromadne wudaće ze Serbskim ewangelskim towarstwom.