Po zwjazkomaj „Im Filter des Gedichts – přez křidu basnje“ (2013) a „Der zweiseitige Beitrag ‒ Wěsty dwustronski přinošk“ (2015) předleži tu třeći němsko-serbski zwjazk ze spisami Kita Lorenca.
Lorenc bě wuznamny basnik, přełožer a wudawaćel, je pak tež intensiwnje na wědomostnym polu dźěłał. Krótko do smjerće zestaji wobšěrny wuběr swojich zdźěla njewozjewjenych literarnokritiskich studijow, kotrež bě wot spočatka 1960tych lět spisał - zwjetša serbsce. Wudawaćelej Franc Šěn a Christian Prunitsch staj manuskript za wozjewjenje přihotowałoj a přispomnjenja a anotacije dodałoj. Serbski dźěl wobsahuje mjez druhim studiju „Wólny wjerš Lajnerta“, wozjewjenu w Lětopisu 1965, a prěnje wozjewjenje wobšěrneje studuje wo Janje Lajnerće a jeho basnistwje. Tohorunja prěni raz wozjewjeny je w zwjazku „Krótki wopis ryma w hornjoserbskej metrice“, kiž nasta lěta 2000 we wobłuku slědźerskeho nadawka Budyskeho Serbskeho instituta „Serbski rymownik“.