Gronka ochranojskeje bratšojskeje wósady pśewóźuju serbske kśesćijany pśez cełe lěto, aby jich zwjaselili a wuskoboźili. Nejnowše wudaśe něnt w Ludowem nakładnistwje Domowina pśedlažy.
Ekumeniska źěłowa kupka za cytanje Biblije jo wubrała za 2025 ako gronko lěta jadno słowo kritiskego wiźenja: „Huzgóńśo wšykno, hobchowajśo to dobre.“ (1 Tes 5,21) A to jo snaź źinsajšny źeń wěcej trjebne ako něga. Ochranojske gronka ga su kśěli wót samego zachopjeńka pśepšosyś do rozgrona wó ewangeliumje, k comuž słuša teke kritiske glědanje na cerkwju, swět a žywjenje. Naslědku pak źo wó wobchowanje togo dobrego, cogož namakajo se namdušu dosć – toś móžo žywjenje pśez zmakanje z Bogom kužde zajtšo wótnowotki zachopiś.