Benedikt Dyrlich je jako serbsko-němski awtor a angažowany zakitowar serbskich zajimow daloko přez mjezy serbskeho sydlenskeho ruma znaty. 2018/19 je w Ludowym nakładnistwje Domowina jeho dwuzwjazkowa dokumentariska awtobiografija z wujimkami z dźenikow, listow, publicistiskich tekstow a rěčanych přinoškow w serbskej a němskej wersiji wušła, pod titlomaj “Doma we wućekach” a “Leben im Zwiespalt”. Němsko-serbski zwjazk z esejemi a přizjewjenjemi k słowu wudospołnja awtobiografisku twórbu z tekstami, kiž so hłubšo z temami zaběraja, kotrež su tam jenož skrótka wobjednane. W někotrych tekstach pak so awtor tež temam wěnuje, kiž so w awtobiografiji njewobjednawaja. Dyrlich wěnuje so wobšěrnje swojim korjenjam, zetkanjam z literaturu a literatami a aktualnym politiskim zjawam. Wudaće je přewažnje němske.