Matej Urban-Turjan (1846─1931) je swětoznatej Homerowej eposaj »Odyseju« a »Ilijadu« z grjekskeho »originala a z jeho měru« zeserbšćił a wudał. 1921 a 1922 stej wobšěrnej, dźensa žadnej knize z 27803 wjeršami z podpěru »serbskich wótčincow a nadobnych darićelow« wušłoj a připóznaće kaž polemiku wubudźiłoj. Zo by so dźensniši čitar z Urbanowym literarnym wukonom zeznawać a jón posudźować móhł, je Marko Malink wuběrk z přebasnjenja »Odyseje« a »Ilijady« kaž tež pokazki z wobšěrneho basniskeho tworjenja Urbana za 52. wudaće w rjedźe »Serbska poezija« přihotował.