Wam, luba serbska młodźina a dźěćina, ale tež wam, lubi serbscy starši, předpołožamy rjanu knihu, prěni dźěl basni a baladow Jana Radyserba-Wjele. Najprjedy namakaće tu hrónčka a basnički za dźěći, tajke lubozne a wjesołe, cyle so hodźace do wokoliny najmłódšich.
Wjetša połojca knihi pak wobsahuje ze swojimi baladami a powěsćemi ze serbskeho kraja a luda pisany wobraz tamneho wotrězka serbskich stawiznow, hdyž bě za naš lud nanajhórje.
Je to čas fewdalizma a nastawaceje noweje klasy kapitalistow-wulkopjenježnikow. Radyserb pak nam tež z wulkej ličbu swojich baladow wožiwi wjele rjanych powěsćow a bajow, kotrež je sebi serbski lud w zašłošći powědał.
We wšitkich tutych wupłodach jewi so Radyserb jako zmužity demokrat, kotryž stajnje steji na stronje luda a kotryž piše z cyłej wutrobu jenož "za ludźi zniska".