Za předležacu zběrku basnjow a prozowych tekstow je Róža Domašcyna wuhrjebała to, štož hižo na swojim městnje njeje: dźěćatstwo a smjeće maćerje, wowcyne bajki, so pozhubjowacu rěč a rozborkany łužiski kraj. Basnica zdrasći namakanki do poetiskich wobrazow a jimacych stawiznow a twari z nimi dom słowow. Nimo swójskich tekstow wobsahuje zběrka tež tójšto přebasnjenjow ze słowjanskich rěčow. Mjez znatymi awtorami staj tež Aleksander Blok a Boris Pasternak.
Po knižnej prěničce “Wróćo ja doprědka du” slědowachu w zašłych wjace hač dwaceći lětach wotměnjejo serbske a němske basniske zběrki, dźiwadłowe hry, prozowe teksty, přebasnjenja a wudawaćelska dźěławosć. Róžu Domašcynu počesćichu z wjacorymi mytami a stipendijemi.