Dypkownje k spočatkej noweho šulskeho lěta předleža nowe dźěłowe zešiwki “Wuknu a zwučuju pisać 1” za šulerjow 1. lětnika. Dźěłowy zešiwk je wusměrjeny na nowu fiblu a předleži jónu w ćišćanym pismje a jónu w šulskim wuchadnym pismje. Wón słuži prěnjotnje k zwučowanju pisma. Na spočatku su zadźěłane motoriske zwučowanja, zwučowanja k słyšenju złóžkow a zwjazanju dypkow. W dalšich nadawkach zwučuja šulerjo jednotliwe pismiki, slěduja wotpowědne złóžki a słowa. Za diferencowanje a skrućenje jewja so po wěstych stronach zwučowanja, kotrež zmóžnja wučerjej, wuknjenski staw šulerja zwěsćić.