„Wšědne hesła“ na lěto 2020 maja mały jubilej. Dwacety raz podadźa so wone na puć do wosadow. Wšón čas je so Hinc Šołta swěru wo zestajenje a přełožk starał, zo by tónle přewodnik swój puć do serbskich křesćanskich swójbow namakał.
290 lět su tute jadriwe bibliske słowa dźeń wote dnja ludźi přewodźeli a jim tróšt a pomoc poskićeli. Dźensa njejsu wone dawno jenož w Bratrowskej wosadźe rozšěrjene. Čitaja so mjeztym we wjace hač 50 rěčach. Loni je prěni raz delnjoserbske wudaće wušło. Tak zwjazuje knižka z hesłami kóždy dźeń čitacu wosadu po wšěm swěće.