„Kóžde lěto wjesele ptači kwas nam přinjese“, tak zaklinči kóždolětnje 25. januara po wšej dwurěčnej Łužicy, hdyž zawdataj sej sroka a hawron ruce. Ptački kwasuja a dźěći w pěstowarnjach a šulach swjeća z nimi. Zajim staršich, dźědow a wowkow a kubłarjow, ale tež turistow a zwonka Łužicy bydlacych na woblubowanym łužiskim nałožku njeje so přez lětstotki zhubił. Kak pak je nałožk scyła nastał? Čehodla stejitej runje sroka a hawron w srjedźišću? Kotre spěwy so spěwaja abo kak paslimy sej pysk a křidlešce? Na tute a dalše prašenja kołowokoło přihotow a pěstowanja nałožka doma abo w pěstowarni kaž tež šuli da awtorka kompetetnje a zrozumliwje wotmołwu. Nastała je praktiska přiručka z paslenskimi a pječenskimi pokiwami, kotraž stwori mosćik mjez tradicionalnym daledaćom a dźesnišim pěstowanjom nałožka.