Gronka ochranojskeje bratšojskeje wósady – to su wšednje někotare krotke słowa z biblije – zwězuju kśesćijanow na cełem swěśe a witaju jich w energijowem pólu lubosći Boga, kaž lětosa w pśedsłowje se pišo. Luźe wšakorakich konfesijow, rozdźělnych kulturow a wšakeje póbóžnosći gronka cytaju a z nimi swój źeń zachopiju. Gronka mógu byś prědna kšaceń, bibliju we wšej šyrokosći a dłymokosći zeznaś. Wóni mógu słowa byś, kenž naměsće tyju, naźeju dawaju abo troštuju.