Kak móžomy historiju tak znaglědniś, ako by nam pśed wócyma stojała? – Južo někotare lěta wudawa budyšyński fotograf Jürgen Maćij wobrazowe zwězki z carnoběłymi fotografijami łužyskich fotografow. Wósebna wustajeńca “Wotmolowane – Mit Licht gemalt” w budyšyńskem Serbskem muzeju jo była za Ludowe nakładnistwo Domowina witana góźba, rěd dalej wjasć a wudaś wobrazowej zwězka z historiskimi fotami serbskeje Łužyce wót zachopjeńka fotografije až do 1930tych lět. Knigły z titelom  »Wotmolowane – Mit Licht gemalt« zaběraju se z Górneju Łužycu a knigły z titelom »Wótmólowane – Mit Licht gemalt« z Dolneju Łužycu. Wobej fotowej zwězka wobswětlujotej z pomocu wjele naglědniwych motiwow, kak jo se to serbske w historiji fotografije pokazało. – Chto drje su te luźe na tych starych fotach a co wěmy wó tych tšojenjach na nich? Njezaźiwa, až su stare fota wósebnje wabjece, wšako jo na nich do nimjernosći wótmólowany kusk casa, kótaryž wuchada do jśmy zachadnosći.