„Na započatku bě Krabat, dobry kuzłar ze serbskeho kraja ...“, tak zahajenske słowa iniciatora Serbskich kulturnych dnjow, Korutanskeho Słowjenca Karla Vouka. Móže so serbska kultura w modernym wobswěće wobchować a što móže wuměłstwo wuskutkować? Wotmołwu dawa katalog, kiž je wušoł jako přewodna publikacija Serbskich kulturnych dnjow. Wón zapřija najnowše twórby Iris Brankačkoweje, Jana Buka, Maćija Bulanka, Marion Kwicojc, Jürgena Maćija, Maje Nageloweje, Sophie Natuškec, Měrki Pawlikoweje, Barbary Wiesnerec, Karla Vouka a literarne teksty Róžy Domašcyneje, Benedikta Dyrlicha, Jurja Kocha a Tomasza Nawki. Wobraz wo aktualnej atmosferje w serbskim kulturnym žiwjenju nastanje w zwisku z komentarami k literaturje, rěči a wuměłstwje, k dźiwadłu, hudźbje a filmje. Awtorojo su mjez druhim Dietrich Scholze-Šołta, Měrćin Wałda a Christina Boguszowa.

Teksty su w němskej, hornjo- a delnjoserbskej rěči a w słowjenšćinje wušli.