Hač ratarske dźěło w běhu lěta, wjesne rjemjesło abo cyrkwinske a swójbne swjedźenje, wšitko je Pawoł Rota (* 1932) ze swojej kameru w nimale połsta lětach zapopadnył. Tak je něhdyši wučer pochadźacy ze Sernjan wobydlerjam Delan zajimawe dopomnjenki domiznje zawostajił. Znaty je Pawoł Rota tež přez njeličomne přinoški w Serbskich Nowinach. Hačrunjež so sam fotograf njemjenuje, su so w běhu časa něhdźe 15000 čorno-běłych negatiwow nahromadźili. W knize, kotraž wuńdźe tele dny w druhim nakładźe, so wuběrk jeho fotow zhromadnje z někotrymi nowinskimi přinoškami na přiměrjene wašnje hódnoća a šěršemu čitarstwu předstaja. Tak je nastał jónkrótny časowy dokument wo Delanach, kiž zwobrazni změny žiwjenskich wobstejnosćow w poslednich lětdźesatkach.
###Pawoł Rota dokumentuje, zapopaduje rysujo swoju wokolinu, portretuje zhromadnosć, kotrejž wón sam přisłuša. Njejedna so wo wobrazy, kiž bychu widźomny proces přeměnjenjow wobskorželi. Zwjetša su to optimistiske wobrazy, byrnjež optimizm nihdy »nasadźeny« njebył. Wobćežny burski wšědny dźeń a druhe dźěła před 50, 40, 30 lětami njebywaja złahodnjowane, ale tež nic heroizowane.
recensija dr. des. Marius Winzeler w Rozhladźe 6/2011