LitMiks ’24. Nowa zběrka
Twórby dorostowych awtorow w nowym šaće wušli
Štož bě hač do lěta 2022 Paternoster, to rěka nětko LitMiks ’24. Nowa zběrka, kotraž je w LND wušła, wobsahuje cyłkownje 27 kedźby hódnych twórbow z pjera 14 młodych awtorow.
Što serbskich młodostnych zaběra? Kotre temy młodźi ludźo literarnje wobdźěłuja a na kotrym niwowje? LitMiks’24 poda dohlad, kotre symješka so aktualnje na serbskim literarnym polu wuwiwaja a kak sylne su. Přewažnje čerpaja młodźi z dožiwjenjow a nazhonjenjow w swojim wušim wobkruhu a dowola čitarjam z tym wid do swojeho kosmosa, towaršnostne abo samo politiske temy so w powědkach a basnjach skerje marginalnje wotbłyšćuja. Proba zmužitosće, putace wobkedźbowanja na pućowanjach, wysk a stysk lubosće, digitalny stres ... LitMiks’24 je połny zajimawych lyriskich a prozaiskich překwapjenkow, nic jenož za młodych čitarjow.