Čěska kapała Lidová muzika z Chrástu, kotraž je mjeztym tež we Łužicy znata, pěstuje na swojich wustupach hižo dlěši čas tež serbski repertoire. Nětko hodźi so jich interpretacija starodawnych ludowych spěwow tež na CD sćěhować! Skupina je rjad serbskich pěsnjow z ludowědnych zběrkow wuběrała a k nowemu žiwjenju zbudźiła. Zajimawje aranžowane wobdźěłanja posrědkuja radosć a zrudobu – emocije, kotrež běchu něhdy njeznaći awtorojo pěsnjow do hudźby spletli. Lubosć, hrubosć, šibałosć – žiwjenje we wšěch swojich fasetach!