Wšědne hesła na lěto 2021 su so hižo 2. meje 2018 w Ochranowje wulosowali. Potom je wobdźěłar z Ochranowskeje bratrowskeje jednoty so hodźacy wučbny tekst z Noweho Zakonja kaž tež štučku z kěrluša abo modlitwu přirjadował. Hotowy manuskript w němskej rěči wupósćele so 55 přełožerjam a přełožerkam na cyłym swěće, kiž swoju rěčnu wersiju za ćišć přihotuja. Najnowše serbske wudaće pak je nimale kaž z kuzłom nastało. Z wulkeho předležaceho fundusa hesłow je Olaf Langner z Rakečanskeje wosady awtomatiske přewzaće a rjadowanje hesłow programěrował. Tak móže nětko tónle přewodnik swój puć do serbskich křesćanskich swójbow namakać.