W lěśe 1731 su wujšli w ochranojskej bratšojskej wósaźe prědny raz kniglicki z gronkom z Nowego a Starego Testamenta za kuždy źeń lěta. Lětosa wujdu ochranojske gronka 290. raz w śišćanej formje. Telik lět su te jědriwe bibliske słowa źeń wóte dnja luźi pśewóźowali a jim trošt a pomoc dawali. Źinsa njejsu wóni dawno jano w bratšojskej wósaźe rozšyrjone, mjaztym cytaju se we wěcej ako 50 rěcach a łoni jo prědny raz dolnoserbske wudaśe wujšło. Tak zwězuju kniglicki z Bóžym słowom kuždy źeń cytajucu wósadu pó wšom swěśe.