Měrćin Wjenk słuša do kruha našich wjelelubjacych młodych pisacych. Lěta 2010 je měł swoje prěnje knižne wozjewjenje w rjedźe za teksty młodych awtorow »Paternoster«. W lětomaj 2011 a 2012 běše mjez wobdźělnikami našeju dźěłarničkow za serbski literarny dorost a z toho časa je zaměrnje za swoju prěničku pisał. Nimo toho wozjewja wobstajnje teksty za dźěći w Płomjenju a recensije. Tež w antologijomaj »Drohe hody, tuni štom« a »Hodownikowanje« je zastupjeny. Jeho prěnja swójska kniha wobsahuje nimo wobšěrnišeje w přichodźe jednaceje powědki »Stary dom« tři krótše powědančka najwšelakorišich žanrow a z městnami w Serbach dotal njeznateho stila. Bjez dźiwa tuž, zo čakataj młody awtor a jeho prěnička po dołhim času njesprócniweho pisanja njesćerpnaj na měnjenje čitarstwa.