Čingiz Ajtmatow (1928–2008) bě swětosławny spisowaćel kirgiskeho pochada. W lěće 1958 wozjewi lubosćinske powědančko »Dźamilja«, kiž bě jako zakónčace dźěło na Moskowskim literarnym Gorki-instituće zapodał. Jeho prěnička bě mjezynarodnje přewšo wuspěšna a pomjenuje so husto jako »najrjeńša lubosćinska stawizna swěta«.
Stawiznu Dźamilje a Danijara powěda Seit – swak a přećel młodeje žony. Dźamilja je ze swojej swójbu žiwa w kirgiskim ailu. Jeje muž Sadyk je we wójnje. Danijar je něhdyši wojak a ćežkeho zranjenja dla domoj pósłany. Hromadźe z Dźamilju wozy wón dźeń wote dnja žito na dwórnišćo. Na dalokim puću po stepje začuwa wona dźeń a bóle wot Danijaroweho spěwanja wuchadźacu móc …