W swoje třećej čitance wěnuje so wudawaćel Marko Grojlich kónčinam ewangelskich wosadow Rakecy, Njeswačidło a Minakał-Łupoj. Znowa je wubrał kopicu zajimawych přinoškow ze starych serbskich nowin a wurězki ze serbskeje literatury wo wšědnym dnju a njewšědnych podawkach. Přez cyłe dwurěčna kniha rysuje na zabawne wašnje žiwy wobraz wo žiwjenju na wsy w druhej połojcy 19. a prěnich lětdźesatkach 20. lětstotka. Hač wo wěčnej serbskej ponižnosći abo wo zasakłym boju Rakečanow wo serbskeho fararja, hač wo pozběhowanju Njeswačidlskeho póstowstwa abo wo wotewrjenju Minakałskeje kofejownje znateho a dobreho pjekarja a dobreho Serba knjeza Robšinka, Serbske Nowiny běchu wo wšěm derje informowani, štož so w serbskich wsach dokoławokoło Kaponicy stawaše.