Jurja Młynkowa 1962 wudata, přewšo wuspěšna publikacija »100 lět serbskeho dźiwadła« twori, wobdźěłana a wudospołnjena, prěni dźěl noweje serbskorěčneje syntezy. Druhi dźěl, spisany wot Dietricha Šołty, zaběra so ze skutkowanjom 1948 załoženeho Serbskeho ludoweho dźiwadła (wot 1963 wobstatk Němsko-Serbskeho ludoweho dźiwadła Budyšin). Na zakładźe nowinskich a časopisowych žórłow so serbski hrajny plan přez poł lětstotka systematisce wopisuje. We woběmaj dźělomaj so powołanske a lajske dźiwadło na přiměrjene wašnje wobkedźbujetej. Čitarjej skići so wobšěrny stawiznopis serbskeho předstajaceho wuměłstwa, kiž je wudospołnjeny z bohatym statistiskim a fotografiskim materialom.