Štóž chce serbsku kulturu z časa moderny předstajeć a rozkładować, złožuje so stajnje na klasikarja serbskeje literatury Jakuba Barta-Ćišinskeho. Za to pak steješe dotal wobmjezowany fundus slědźerskeje literatury k dispoziciji, w kotrejž aktualne přepytowanja a interpretacije w dalokej měrje falowachu. W oktobrje 2009 wotmě so mjezynarodna konferenca Serbskeho instituta k žiwjenju a tworjenju basnika, hdźež so najnowše wuslědki předstajichu. 23 přinoškow su w předležacym konferncnym zběrniku zjimane. W nich so wosobina Ćišinskeho, jeho nahlady, žiwjenske wobstejnosće a poćahi, kaž tež jeho basniske a publicistiske zawostajenstwo, jeho rěč abo jeho hač do dźensnišeho trajaca recepcija do srjedźišća staji. Přinoški wotewěraja čitarjej nowe perspektiwy kritiskeho posudźowanja a hódnoćenja tworjenja Ćišinskeho a skića mnoho pokiwow k dalšej zaběrje ze serbskim narodnym basnikom.