„Nano, što tón kran tamle čini? Čehodla kładu mužojo roły do zemje? Štó kryje třěchu?“ Znajeće tajke prašenja dźěći ducy po měsće abo po wsy? Wotmołwy namakaja pjerachi wot dweju lět w serbskim wobrazowym słowniku "Twarimy dom". Papjercowa wobrazowa kniha rozjasnja młodym twarskim mištram z pomocu cyłostronskich barbnych ilustracijow, kak nowy bydlenski dom Larsa a Leny a jeju staršeju nastawa. Kaž z hižo předležaceju wobrazoweju słownikow „Žiwjenje na burskim statoku“ a „Na polu a łuce“ znate, móža dźěći we wulkich wobrazach pytać, štož je na kromach stronow namolowane a pomjenowane.