Hesło na lěto 2012: Jezus Chrystus praji: Moja móc je w słabych mócna. (2 Kor 12,9)

Přewodne słowo k 282. wudaću hesłow Ochranowskich hesłow

Lube čitarki a lubi čitarjo!

Hesło, kotrež móhło nas kusk rozhorić, přewodźa nas přez lěto 2012. Nic přez tych, kiž su sylni a mócni a w medijach prezentni, chce Boža móc w tutym swěće skutkować, ale přez słabych, chorych, zbrašenych, přez tych, kotrychž lochko přewidźimy. To wšak klinči njerealistiske a njehodźi so tež ze statistiskimi přepytowanjemi dopokazać, a tola wěmy: Přeco znowa su to słabi ludźo byli, kotřiž su něšto njewšědne a wulkotne pohibowali – w mjenje našeho Boha. W Němskej smy to na jimace wašnje dožiwili, jako so ludźo ze wšěch worštow z modlitwami wo měr a ze swěčkami na spotorhanju murje mjez wuchodnej a zapadnej Europu wobdźělichu.
Tež tehdom na spočatku, jako so poněčim ewangelij po wšěm swěće šěrješe, steješe muž, słaby a chorowaty a swojeje zańdźenosće dla poćeženy. Pawoł pisa ze swójskeho nazhonjenja. Wón je sam na sebi dožiwił, zo Boža móc w nim, w słabym čłowjeku, skutkuje. Wón je Božu móc nazhonił, a po nim su přeco znowa ludźo dožiwili, zo tež w nich Boža móc skutkuje a přez to tójšto pohibuje, byrnjež woni słabi a bjezmócni byli.
Ochranowske hesła, to je knižka za wšědnu pobožnosć, kotruž mała křesćanska wosada wudawa – a tola su hesła wjele ludźom z požohnowanjom a ze swěrnym přewodźerjom a wuraz Božeje mocy.
Tež w lěće 2012 budu ludźo wšitkich kontinentow bibliske słowo z Ochranowskich hesłow čitać a rozpominać we wšědnym žiwjenju. To su ludźo kaž Wy a ja, husto słabi ludźo, kotrymž pak so we wšědnym hesle Boža móc jewi a póznaće, zo je tuta móc tež w nich mócna.
Jako čitarjo hesłow po wšěm swěće smy my dźeń wote dnja mjez sobu zwjazani a čerpamy z tehole žórła Božeje mocy. Bóh dał, zo bychu hesła tež Was přez lěto 2012 swěru přewodźałe a znamjo Božeje mocy byłe, kotraž chce tež we Was a přez Was mócna być.

Ochranowska bratrowska wosada