Z nahladneho basniskeho zawostajenstwa Jana Kiliana (1811-1884) z Delan pola Rachlowa je Trudla Malinkowa wuběrała najrjeńše a najhódniše dźěła. Kilian sam drje je 1846 dźěl z nich w knižce «Spěwarske wjesele» wozjewił, pozdźišo nastate kěrluše pak su rozbrojene w časopisach, kěrlušowych knihach a spěwarskich. Ze zešiwkom 43 w rjedźe Serbska poezija maja wšitcy, kiž so za basniske tworjenje Jana Kiliana zajimuja, kotřiž jeho kěrluše rady spěwaja a wo jeho basniskim skutkowanju wjace wědźeć chcedźa, k tomu móžnosć a přiležnosć. Basnjam, kěrlušam a přełožkam su přidate biografija, krótke hódnoćenje, žórła, wujasnjenja a přispomnjenja. Nutřkownu wobalku pyša kaž při kóždym zešiwku «Serbskeje poezije» pokazki na žiwjenje a skutkowanje basnika.