Adolf Černý (1864–1952), česki spěchowar dobroćel Serbow, skutkowaše jako literarny historikar a ludowědnik spomóžnje na polu serbskeje kultury. Zo bě wón tež basnik a zo je pod pseudonymom Jan Rokyta w swojej domiznje wjace hač 20 zběrkow wudał, je tu mjenje znate. Někotre z jeho basnjow su Jakub Bart-Ćišinski, Mina Witkojc a Ota Wićaz do serbšćiny přenjesli. Tute basnje a pokazki z Černowych přebasnjenjow čěskeje poezije 19. lětstotka do serbšćiny skića zajimowanemu čitarjej dohlad do wuměłskeho dźěła čěskeho přećela našeho luda.

Pokazka

Mje hišće hrěje posměwk twój …

Mje hišće hrěje posměwk twój
a wóčko twoje rjenje,
we słóncu lubje při mni stój,
ty lilijowe kćenje!

Chil ke mni so kaž ćichi són,
kotryž nas koši z lětom,
a kryj mój rozbrózdźeny zdónk
ze sněhoběłym kwětom.

(přel. O. Wićaz)