Pola Bulankec knježi čiłe žiwjenje. Hač w hródźi abo chlěwje, na zahrodźe abo polu: wšudźe hlada Bulankec wujej a ćeće dźěło do rukow. Kruwy chcedźa dejene być, skót trjeba wšědnje swoju picu a k tomu hišće přińdźe, zo so žrěbjo narodźi.
Tajke prawe burske žiwjenje dźěći dźensniši dźeń zrědka hdy dožiwja. Za zwěrjata, rostliny a mašiny kaž tež za dźěło na tajkim dworje pak so při wšěm zajimuja. Papjercowa kniha wabi najmjeńšich k wobhladanju a wopisowanju pisanych wobrazow zhromadnje ze staršimaj, wowku abo dźědom. Z pomocu wobrazoweho słownička na kromje jednotliwych stronow móža sej pjerachi wotpowědny słowoskład přiswojić.