Hdźe nańdu literaturu k starym serbskim hrodźišćam při Łobju a Solawje? Dawaja pojednanja k serbskej stenografiji? Kotre antologije serbskeje literatury wuńdźechu we wukraju? Po tym zo je Jakub Wjacsławk w lěće 1929 prěni zwjazk Serbskeje bibliografije wudał, pytaja studenća, wědomostnicy, wučerjo, domizniscy slědźerjo, chronisća a žurnalisća w njej na wotmołwy na tajke prašenja. Tež za wšitke fachowe a zjawne biblioteki je Serbska bibliografija njeparujomny dźěłowy srědk.
Předležacy zwjazk tuteje přiručki k serbskemu pismowstwu zapřija w mjeztym zwučenym wobsahowym rozrjadowanju něhdźe 8500 titulow a pokazuje wužiwarjej cyłu šěrokosć serbskeho literarneho tworjenja prěnich lět noweho lěttysaca. Přidatne registry wolóža pytanje za twórbami wěsteho awtora abo literatury k jednotliwym wosobam a městnam.