Čitanski wurězk

Adam a Jěwa

Na šěsć dnjach zrjadowa Bóh, štož bě puste a prózdne. Ćmě přida swětło a da słóncu, měsačkej a hwězdam swěćić. Tak buštej dźeń a nóc. Bóh wotdźěli wody wot zemje a zwjelbowa njebjo nad zemju. Na kraju a we wodźe počachu rostliny rosć. A Bóh stwori małe a wulke zwěrjata, kotrež wodu, kraj a rum pod njebjom pjelnjachu. Bóh požohnowa swoju stwórbu a da jej nadawk: Budź płódna a rozmnož so. A potom sformowa Bóh z procha zemje muža a žonu. Zadu jimaj dych, zo byštaj jemu podobnaj byłoj. Wón požohnowa muža a žonu a praji: Budźtaj płódnaj a rozmnožtaj so, napjelńtaj zemju a hladajtaj, štož sym za waju stworił. Na sedmym dnju Bóh wotpočowaše. Wón požohnowa tónle dźeń a sčini jón swjaty.
Muž a žona, Adam a Jěwa mjenowanaj, wědźeštaj, zo Bóh jeju lubuje, a wonaj lubowaštaj Boha. Běštaj žiwaj w paradizu. Smědźeštaj wšitko činić, štož jeju zwjeseleše. Jenož jedne bě Bóh jimaj zakazał: Njesmědźeštaj płody jednoho ze štomow jěsć. Spočatnje dźiwaštaj čłowjekaj na Božu kaznju, ale potom přemó jeju wćipnota. Wzaštaj sej wot zakazanych płodow.
Jako so Bóh čłowjekow wopraša, čehodla njejstaj jeho kaznju dodźeržałoj, pytaštaj za wurěčemi a hańbowaštaj so.
Bóh pak bě zrudny a přesłapjeny jeju njeposłušnosće dla. Wón wuzamkny Adama a Jěwu z rjaneho a škitaneho žiwjenja w paradizu. Wotnětka dyrbještaj dźěłać a so samaj za swoje žiwjenja starać. Ale Bože žohnowanje a Boža lubosć jeju přewodźeštej.