Literarne dźěła Rudolfa Mjenja (1767–1841) su dotal dosć njeznate. Z 53. zešiwkom rjada Serbska poezija so wone prěni króć w cyłku spřistupnja. Dr. Franc Šěn je zestajał serbske basnje, mjez nimi „Chwalba burstwa“ a „Te žně“, kaž tež němske teksty.
Lipšćanscy serbscy studenća česćachu sej Rudolfa Mjenja jako wustojneho znajerja serbskeje rěče, nimo toho běše wón za swój čas sławjeny basnik. Handrij Zejler je sej jeho basnje wulce wažił. Mjeń je swoje pjero přikładnje wjedł, bě w antikskich metrach runje tak doma kaž w stilu ludoweho spěwa.
Wobšěrne wujasnjenja a redakciske přispomnjenja na kóncu zešiwka posrědkuja zajimcam mnoho dalšich informacijow a pokiwow.