W lětomaj 1989 a 1991 wuńdźe dwuzwjazkowy němsko-hornjoserbski słownik, kotryž je so mjeztym jako standardne dźěło za hornjoserbsku rěč etablěrował. Tola po wuńdźenju tutoho słownika je so hornjoserbšćina po 1989 dla hłuboko sahacych změnow w towaršnosći a hospodarstwje sylnje dale wuwiła. Tójšto noweho słowoskłada z politiki, wědomosćow, wuměłstwa, hospodarstwa a druhich wobłukow je so do našeho rěčneho systema přiwzało. Helmut Jenč, kiž bě hižo při nastaću dwuzwjazkoweho słownika nawoda awtorskeho kolektiwa, je ze sobudźěłaćerkomaj Anju Pohončowej a Janu Šołćinej hornjoserbsku leksiku, kotraž hišće w słownikach zapisana njebě, hromadźił a zestajił. Kniha so formalnje na dwuzwjazkowym słowniku orientuje a jón zmysłapołnje wudospołnja. Wona wuruna z tym do dalokeje měry njedostatk, kotryž bě w zašłych lětach w hornjoserbskej leksikografiji nastał.