Žana druha tema hač lubosć njezaběra tak sylnje fantaziju a postaja spisowaćelske tworjenje a namaka so w kóždej časowej dobje. Lubosć njeje wjazana na hranicy, njeznaje žanych mjezow a žaneje narodnosće. Lubosć wubudźa zbožownosć, radosć, ale tež nadźiju, žedźbu a žarliwosć. Wo wšěm tym pisachu tež serbscy spisowaćeljo, tajke a podobne temy špiheluja so tež w jich literarnych twórbach.
Za předležacu literarnu čitanku je Dorothea Šołćina zestajała dźěła zašłych lětdźesatkow, w njej namakaja so powědančka, wujimki z powědančkow kaž tež basnje a spěwy wobšěrneho serbskeho pismowstwa.