»To njeměło so z pomjatka zhubić!« Ze zwrěšćenjom socialistiskeho NDRskeho stata nazymu 1989 so nadobo wo čłowječich dóńtach a wosudach w zwisku z politiskim přesćěhanjom poslednich 44 lět rěčeše a pisaše. Tajne słužby Sowjetskeho zwjazka a MfS, w ludźe bórze jako »stasi« wuwołane, běchu tysacy njewinowatych wuskušowali, zajeli a zasudźili – někotrych samo k smjerći –, jenož dokelž běchu tući politiske a hospodarske wobstejnosće kritizowali, dokelž njemějachu »systemokonformne měnjenje«. Mjez tutymi běchu tež Serbja, štož bě so dotal zatajiło, zamjelčało abo jenož we wuskim priwatnym kruhu diskutowało.
W tutej knize předstajeja so dóńty Serbow, kotřiž přińdźechu do konflikta ze sowjetskej wobsadniskej mocu abo ze stasi. Někotre z přinoškow – pak dopomnjenki potrjechenych samych pak rozprawy třećich – kaž tež mnoho dokumentow a fotow njeběchu dotal wozjewjene.