Kóžde druhe lěto w prózdninach přijědźe na połsta wukrajnikow do Łužicy, zo bychu tu zakłady za samostudij serbšćiny našli abo serbsku rěč donawuknyć móhli. Do kruteho programa tajkeho kursa słušeja přednoški fachowcow wo swojim najnowšim slědźenju. Kursanća přichadźeja tež z wočakowanjemi; tak přeješe sebi finski přełožer Eero Balk informacije wo stawje w serbskich šulach. Z toho nasta potom mały stawizniski cyklus. Zo bychu kursanća a druzy zajimcy přednoški woměrje čitać móhli, wuda Serbski institut, w tradiciji Lipsčanskeho Instituta za sorabistiku, tute tež w ćišćanej formje. Předležacy zešiwk spřistupnja přinoški zašłeju ferialneju kursow. Wot aktualnych stawizniskich a rěčespytnych slědźenjow hač k prašenjam k stawej najnowšeje serbskeje prozy abo k nałožowanju serbskeje rěče w zjawnosći – bywši a přichodni kursanća a tež někotryžkuli Serb budu so za to zajimować.