Za serbsku literaturu
Ludowe nakładnistwo Domowina (LND)
1958 załožene Ludowe nakładnistwo Domowina je w hornjołužiskim měsće Budyšinje doma, redakcija delnjoserbskeho tydźenika Nowy Casnik dźěła w Choćebuzu. Přez 3000 publikacijow w serbskej a němskej rěči je dotal wušło a swědči wo zaměrnym pokročowanju wjac hač 450-lětneje tradicije serbskeho pismowstwa.
Hornjoserbski dźenik Serbske Nowiny a delnjoserbski tydźenik Nowy Casnik kaž tež časopisaj Rozhlad a Lětopis słušeja runje tak do šěrokeho editoriskeho programa kaž knižne wudaća, wučbnicy a wučbne materialije. Nakładnistwo wuwiwa a nakładuje publikacije, kiž so na Serbow, jich identitu, kulturu a wědomosć poćahuja. Wuchadźeja beletristiske twórby načasnych serbskich spisowaćelow kaž Jurja Brězana, Kita Lorenca a Róže Domašcyneje. Nimo toho so prawidłownje nakładuja dźěła klasikarjow kaž Zhromadźene spisy Handrija Zejlerja, Jakuba Barta-Ćišinskeho a Mata Kosyka. Němskej zjawnosći spřistupnja so serbska literatura přez rjad „Die sorbische Bibliothek“. We wědomostym časopisu „Lětopis“ a w „Spisach Serbskeho instituta“ wuchadźeja wuslědki wědomostnych slědźenjow na polu serbskeje rěče, literatury, stawiznow a ludowědy. Wažne ćežišćo editoriskeho dźěła nakładnistwa tworitej, hladajo na zdźerženje a rewitalizaciju serbskeje rěče, dźěćaca a młodźinska literatura. Nimo nowych dźěćacych knihow so prawidłownje tež licencne wudaća swětoweje literatury a zhromadne wudaća LND z nakładnistwami druhich słowjanskich ludow čitarjam poskićuja.
W kooperaciji z Rěčnym centrumom WITAJ wuchadźeja wučbnicy, dźěćacej časopisaj Płomjo a Płomje a fachowy časopis Serbska šula.
Smolerjec kniharnja w Budyšinje je jeničke městno w Němskej, hdźež so čitarjej wšitke serbske a němske knihi nakładnistwa poskićuja, k tomu antikwariske wudaća, zynkonošaki, widea a computerowe hry. Prawidłownje přewjedu so awtorske čitanja a knižne premjery. W meji 2000 załoži so towarstwo „Přećelow Smolerjec kniharnje“, kiž podpěruje zaměry kniharnje.
Ludowe nakładnistwo Domowina
Sukelnska/Tuchmacherstr. 27 · 02625 Budyšin/Bautzen
tel. (0 35 91) 57 70 · fax (0 35 91) 57 72 43
e-mail: geschaeftsfuehrung domowina-verlag.de
